உன்
நேசங்களுக்கான
என் காத்திருப்புகளை
சுடும் பாலை மணலில்
இரைக்காக
ஒளிந்து கிடக்கும் விஷப்பாம்பின்
காத்திருப்புகளாகக் கருதாதே..
அது
துளி மழைக்காக
காத்திருக்கும்
பாறையிடுக்குத் தேரையின்
காத்திருப்பையொத்தது..
என்றாலும்
உன் கருத்தியலை உண்மையென்றும்
என் வார்த்தைகளை பொய்யென்றும்
கொள்ள
உரிமையுண்டு உனக்கு.

நீ விலகி சென்ற பின்பான நாட்களில்
வலிகளால் மட்டுமேயான உலகமொன்று
என்னை விழுங்கிக்கொண்டது
மரண ஓலங்களும் இரத்தத்தின் பிசுபிசுப்புகளும்
தலைக்குள் ஓயாது தொடர ஓடிக்கொண்டேயிருந்தேன்
உன் உருவங்கள்
சிரித்தபடி கொஞ்சியபடி முறைத்தபடி அழுதபடி
எப்போதுமாய் எதிர்ப்பட்டுக் கொண்டேயிருந்தன
உன் உருவங்கள் கடந்த ஒவ்வொருமுறையும்
நான் உடலெங்கும் கூர்நகங்களால் கீறிக்கொண்டேன்
தனிமைகள் தகிக்கும் வெப்பங்களை உமிழ்ந்தன
நான் மாறி மாறி
தற்கொலை செய்துகொண்டேயிருந்தேன்
உன் நினைவுகள் விலகுவதாயில்லை
நான் உன் உருவங்களைக் கொலைசெய்ய துணிந்தேன்
உன் வெவ்வேறு நிற உருவங்களுக்கு மத்தியில்
நீ சிரித்துக்கொண்டேயிருந்தாய்..

வார்த்தைகள் மறுகும்போது
எழுத தொடங்கி !
வார்த்தைகள் தீர்ந்தபின்
வேலையை பார்க்க!

இடைப்பட்ட நேரத்தில்
துலாவியபொழுது
ஊற ஆரம்பித்த
வார்த்தைகள் அத்தனையும்,
எனதல்ல - என
புரிந்த நொடியில்
மறைய தொடங்கின,
ஏற்கனவே சொல்லியும்விட்ட,
வார்த்தைகள்!

நினைவுகளை தினம்
போத்தல்களில் நிரப்புகிறேன்
முடிந்தவுடன் அவை
வெறுமையாய் புன்னகைக்கிறது
என்னுள்.

If you love something set it free if it comes back its yours if not it was never meant to be.